تعال نلعب لعبة تفكير بسيطة، تذكّر معي متى آخر مرة استثمرت بتدريب او استشارة بقيمة ماديّة عالية من مدرب اقتنعت فيه من محتواه القصير، بدون ما تشوف له عدّة مقالات، بودكاست، او فيديو يوتيوب
غالباً ما حتقدر تتذكّر، لأنه صعب جداً انك تستثمر مع خبير بدون ما تعرف خبرته العميقة والطريقة اللي يوصلك فيها للنتيجة اللي انت متمنّيها
معناها كيف متوقّع من الناس تستثمر معك بس من مشاهدتهم الك بالريلز؟
اكذب عليك و أقول لك غير ممكن بس عشان أقنعك بالفكرة؟ بل ممكن وممكن جداً وفي أمثلة ناجحة للموضوع
لكن تعال قارن بين قيمة، سلطة وبراند خبير مركز على المحتوى الطويل والقصير معاً وبين خبير مركز على المحتوى القصير فقط
"إذا حابب تبني علامة شخصية طويلة المدى، لازم تعتمد على المحتوى الطويل، هو المكان الوحيد اللي الناس بيشوفوا فيه دماغك شغال."
– دكتور ويوتيوبر مشهور (Ali Abdaal)
طيّب ليش اليوتيوب ضرورة؟
١- المحتوى الطويل بيحرّرك من "ترندات السكربتات" وبيخلّيك تبني ثقة حقيقية
أغلب المنصات اليوم عم تجبرنا نكتب المحتوى المحتوى بطريقة تخلّي الشخص يوقف على الفيديو، جُمل مثيرة، سرعة بالكلام
بس انت كخبير أو مدرّب، هدفك الأساسي تورجي الناس خبرتك العميقة، واليوتيوب المكان الأفضل لهالشيء لأنه الناس بيدخلوا عليه بعقلية التعلّم أكثر من الترفيه
وحتى تغيّر قناعات الناس، بدّك مساحة تحكي، تشرح، تسرد قصص، وتورجي عمق خبرتك
٢- يوتيوب محرّك بحث أكثر منه سوشيال ميديا
اللي بيفوت على إنستغرام، أغلب الوقت ما عنده هدف، داخل يتسلّى ويترفه ويضيع وقت
بس اللي بيفوت على يوتيوب عم يبحث
سواءاً عن حل لمشكلته أو هدف حابب يوصلله، ولو اخترت العناوين والصور المصغرة الصحيحة، رح تعرف تصيد هالناس
لما بيكتب “كيف أجهّز عرض تدريبي مربح” أو “ليش محتواي على إنستغرام ما بيبيع”
يعني هو أصلاً عنده ألم… أو صار يعرف إنه في حل… وعم يدور عليه
لما يلاقي فيديو إلك بيجاوب على سؤاله، بيحس إنك فهمته
وبيصير يشوفك كمصدر موثوق من أول مشاهدة
وهون بيبدأ مسار الثقة يلي بيوصل للشراء بسهولة أكبر
٣- المحتوى الطويل بيغذي كل أنواع المحتوى الأخرى
في ناس بتفكّر إنو الفيديو الطويل بياخد وقت…
بس الحقيقة؟ هو محرّك للمحتوى مو مضيعة وقت
فيديو واحد مدته ١٠ دقايق ممكن يطلع منه:
- ٣ لـ ٥ ريلز على إنستغرام
- نشرة بريدية
- تويتات أو منشورات لينكدإن
- بودكاست
- محتوى لعرض مجاني Lead Magnet
يعني بدل ما تضل كل يوم تفكّر "شو بدي أنزل؟"،
بتبني فكرة واحدة… وبعدين بتقص منها محتوى لكل مكان
بالإضافة انه محتواك القصير رح يصير أعمق وأقوى
بس كيف تبدأ بمحتوى اليوتيوب
"فقرة الخطوات العملية " الأنظمة
١- فكّر بسؤال واحد الناس بيسألوك إياه دايمًا
ابدأ القناة بناءاً على تخصصك ولا تتشتت، ابدأ من مشكلة حقيقية أو سؤال بيتكرر من جمهورك. هذا هو مدخل الفيديو الطويل، ويعني انه فيه ناس أصلاً بتدور على الجواب
٢- ابني على فكرة رئيسية واحدة + قصة/مثال
ما تحاول تغطي كل شيء. ركّز على فكرة وحدة وتعمّق فيها من خلال قصة، حالة عميل، أو مثال واضح. هذا اللي بيبني الثقة
٣- بعد ما تسجّل… استخرج منه 5 قطع قصيرة
حوّل كل فكرة داخل الفيديو لريل أو بوست قصير. هيك بتحوّل التعب مرة وحدة لمحتوى لأسبوع كامل
و مثل ما بقول دائما : خليك مميز، لا تأجل وقوم خذ الخطوة فوراً
